கன்னியாகுமரி: தக்கலையைச் சேர்ந்த லாரன்ஸ் 1991ஆம் ஆண்டு பத்மநாபபுரம் சட்டப்பேரவைத் தொகுதியில் அதிமுக சார்பில் போட்டியிட்டு வெற்றிபெற்றார். 1993 முதல் 1996 வரை வனத்துறை அமைச்சராக இருந்தார். அதிமுக மாவட்ட செயலாளராகவும் பொறுப்பு வகித்து வந்தார். 2006இல் திமுகவில் இணைந்த லாரன்ஸ் மாநில சிறுபான்மையினர் அணி துணை செயலாளராக இருந்தார்.
பின்னர் உடல் நலக்குறைவால் கடந்த 2020-ஆம் ஆண்டு டிசம்பர் மாதம் காலமானார். முன்னாள் அமைச்சர் லாரன்ஸின் மகன் ஆண்டோ ஸ்டாலின். இவர் பொருளாதார குற்றப்பிரிவு அலுவலகத்தில் கடந்த 2021ஆம் ஆண்டு மோசடி புகார் ஒன்றை அளித்துள்ளார்.
அந்தப் புகாரில், "கடந்த 2012ஆம் ஆண்டு சென்னை அயனாவரத்தில் நிதி நிறுவனம் ஒன்றை தொடங்கினேன். நிதி நிறுவன தொழிலில் முன் அனுபவம் இல்லாததால் நிதி நிறுவனங்களில் இடைத்தரகராக பணிபுரிந்த ரமேஷ் என்பவரை எனது நிறுவனத்தில் மேலாளராக பணி அமர்த்தினேன்.:
6 வருடங்களாக நிதி நிறுவனத்தில் பெருமளவில் நஷ்டம் ஏற்பட்டதால், கடந்த 2018ஆம் ஆண்டு நிதி நிறுவனத்தின் கணக்குகளை சரிபார்த்த போது 30 கோடி ரூபாய் வரை மோசடி செய்யப்பட்டிருந்தது எனக்கு தெரியவந்தது. மேலும், எனது நிறுவனத்தின் மேலாளர் ரமேஷ், அவரது கூட்டாளியான சுதாகர், சாய் சரவணன், ரமேஷின் இரண்டாவது மனைவியான பிரேமசுதா ஆகியோருடன் இணைந்து இந்த மோசடியில் ஈடுபட்டது தெரியவந்தது.
தீவிர விசாரணையில் வெளிவந்த உண்மை : குறிப்பாக, ரமேஷ் மற்றும் அவரது கூட்டாளிகள் இணைந்து 116 போலியான நிறுவனங்களை உருவாக்கியுள்ளனர். அந்த நிறுவனத்தின் பெயரை பயன்படுத்தி தங்கள் நிறுவனத்திலிருந்து 30 கோடி ரூபாய் வரை பைனான்ஸ் பெற்று மோசடி செய்தது தெரியவந்தது. மேலும், மோசடி பணத்தை உடனடியாக ரமேஷின் இரண்டாம் மனைவியான பிரேமசுதாவின் வங்கி கணக்கிற்கு மாற்றியதும் கண்டுபிடிக்கப்பட்டது.
மேலும், மோசடி செய்த பணத்தில் சுதாகரன், கடந்த 2017ஆம் ஆண்டு கலையரசன் நடிப்பில் உருவான 'எய்தவன்' திரைப்படத்தை தயாரித்துள்ளார். இந்த புகார் தொடர்பாக பொருளாதார குற்றப்பிரிவு காவல் துறையினர் வழக்குபதிவு செய்து மோசடி செய்த மேலாளர் ரமேஷை, கடந்த டிசம்பர் மாதத்தில் கைது செய்தனர். இதுவரை ரமேஷின் இரண்டாவது மனைவி பிரேமசுதா, சுதாகரன் என மொத்தம் மூன்று பேரை காவல் துறையினர் கைது செய்துள்ளனர்.
இலங்கை தமிழர்: மேலும், இவர்களிடம் காவல்துறையினர் நடத்திய விசாரணையில் சுதாகர் இலங்கை தமிழர் என்பதும், இந்திய பாஸ்போர்ட் மூலமாக தமிழ்நாட்டில் தங்கி வந்தது கண்டுபிடிக்கப்பட்டது. என்னிடம் மோசடி செய்த பணத்தில் வாங்கப்பட்ட பி.எம்.டபுள்யூ உள்ளிட்ட 4 கார், 5 கோடி மதிப்புள்ள சொத்துகளை பொருளாதார குற்றப்பிரிவு முடக்கி உள்ளனர்.
நிதி நிறுவனம் மூலம் பல்வேறு மோசடியில் ஈடுபட்ட ரமேஷ் மற்றும் அவர்கள் கூட்டாளிகளிடம் இருந்து மோசடி செய்யப்பட்ட 30 கோடி ரூபாய் பணத்தை மீட்டு காவல் துறையினரிடம் ஒப்படைக்க வேண்டும்" என ஸ்டாலின் கோரிக்கை வைத்துள்ளார்.
காவலர்கள் தகவல்: இந்நிலையில், ஆண்டோ ஸ்டாலினிடம் மோசடி செய்த பணத்தை தடை செய்யப்பட்ட இயக்கங்களுக்கு சுதாகரன் பயன்படுத்தி உள்ளாரா என்ற கோணத்திலும் காவல் துறையினர் விசாரணை நடத்த உள்ளனர்.
மேலும், தலைமறைவாக உள்ள சாய்சரவணன் உட்பட ரமேஷின் உறவினர்களான கீதாவானி, வேணுகோபால் ஆகியோரையும் தீவிரமாக தேடி வருவதாக பொருளாதார குற்றப்பிரிவு காவல் துறையினர் தெரிவித்துள்ளனர்.
இதையும் படிங்க: நடிகை மீரா மிதுனை ஏப்ரல் 4ஆம் தேதி வரை நீதிமன்றக் காவலில் அடைக்க உத்தரவு
